VIGAN
Ang mga tula ko ay mga ligaw na salita --
Naghahanap ng kani-kanilang mga lugar.
Pagala-gala. Paikot-ikot
Binabagtas ang bawat iskinita,
sinisisid ang bawat kalsada
sa pag-asang makahahanap ng
palatandaan pauwi
sa kani-kanilang mga tahanan.
Hanggang sa nakilala kita.
Matiyagang itinuro ng mga yakap mo
sa mga tula ko ang daan pauwi.
Ang mga ngiti mo ang nagsilbing
ilaw na nagpaliwanag sa bawat
madidilim na pasilyo,
at sa bawat paglalakbay ng bawat isa,
pag-ibig mo ang naging gabay hanggang sa
ang mga estrangherong salitang ito
ay naging pamilyar muli sa
daang binabaybay nila;
Papunta sa yo.
Ikaw, ang dahilan kung bakit ako sumusulat ng mga
tulang tungkol sa pag ibig.
Ikaw, ang ibig, at sa'yo lamang ako libig. Ikaw, ang tahanan nitong mga tula ko.
